fuad_agayev (fuad_agayev) wrote,
fuad_agayev
fuad_agayev

"Qış Bulvarı" - kütləvi dağıntılar, evlərin qəza vəziyyətinə salınması - Yaşamaq təhlükəsi

 Dəfələrlə bildirmişdik ki, Bakı şəhər icra hakimiyyətinin Zülfəli İsmayılov adlı məmurunun başçılığı altında heç bir hüququ əsas olmadan «Qış Bulvarı» çətiri (adı) altında yüzlərlə vətəndaşların yaşadıqları, xüsusi mülkiyyətdə olan evləri, mənzilləri yaşamaq üçün yarıtmaz hala salırlar.

Bu gün Nəsimi rayon məhkəməsi Rəsul Rza küçəsindəki 2 saylı dalan və Ə.Topçubaşov küçəsindəki 64 saylı evdə, eləcə də onların ətrafına baxış keçirməlidir.

Saat 12.13-də Rəsul Rza küçəsindəki 2 saylı dalanda yaşayan iddiaçılardan biri – Mahmudova Valeriya mənə zəng vurdu ki, onların həyətinin divarlarını ekskavatorla Zülfəli İsmayılov və onun qohumunun başçılığı altında dağıdırlar. Dəhşətlisi budur ki, həyətin divarı həm də onların yaşadıqları mənzilə də aiddir. Tez həmin həyətə yollandım. Əvvəl ekskavatorun kənardan şəkillərini çəkdim, sonra isə həyətə daxil oldum…

Həyətdəki mənzərəni təsvir etmək çətindir! Hər yan toz içində, ekskavatorun çalovu (kovşu) divarı dağıdır, hər an faciə baş verə bilər, çalov divara elə zərblə dəyir ki, Mahmudovanın mənzilinə qalxan pilləkənlərin və mənzilin hələ yerində qalması özü təəccüb doğurur.

Avropa İnsan Hüquqları Məhkəməsi hətta terrorçularla döyüş dövründə belə onların evlərinin dağıdılmasını qeyri-insani rəftar hesab edirsə, hansı haqla bizim vətəndaşların mülkiyyətinə, mənzilinə, şəxsi təhlükəsizliyinə, həyat və sağlamlığına bu cür qəsdə yol verilir?

Bəlkə Füzuli, Rəsul Rza, Şəmsi Bədəlbəyli və Əlimardan Topçubaşov küçələrində, layihəsi çoxdan batırılmış «Qış Bulvarı» ərazisində yaşayanlar PKK terror təşkilatından daha təhlükəlidir?

Hansı əsasla Prezident Administrasiyasına, Baş Prokurorluğa, digər hüquq mühafizə orqanlarına vətəndaşların göndərdikləri müraciətlər hadisələrin önündə olan Bakı şəhər icra hakimiyyətinə göndərilir?

Necə olur ki, Hacıbala Abutalıbov, Zülfəli İsmayılov kimilər dövlət qulluğu ilə bir araya sığmayan hərəkətlər edirlər, onlara gözünün üstündə qaşın var deyən yoxdur?

Hakimiyyətdəkilərin niyyəti vətəndaşların öz ev-eşiklərindən kvadrat metri 1500 manatdan imtina etməsinə nail olsunlar. Məcburiyyət qarşısında ata-baba mülkünü, mənzilini tərk etməyə məcbur olanların sayı yüzlərlə, bəlkə də minlərlədir. Ərazidə partlayış nəticəsində artıq bir nəfər həyatını itirmişdir, ürək-sinir sistemi bu amansızlığa davam gətirməyən daha neçə-neçə adam dünyasını dəyişmişdir. Nə baş verməlidir ki, bu özbaşınalıq, qanunsuzluq dayandırılsın?

Bir şeyi də bilin və agah olun – Qış Bulvarı layihəsi çoxdan ayaq altına atılmişdır, belə ki, həmin layihəyə görə, bulvar dəmiryolu vağzalından, C.Cabbarlının heykəlindən başlayaraq Dövlət Dram Teatrına, daha sonra isə Elmlər Akademiyasına qədər uzanmalı idi. Bir sözlə, bu layihənin reallaşması üçün əvvəl Mərkəzi Bank sökülməli idi. Söküldümü? Xeyr! Əvəzində onun arxasında yeni Ticarət Mərkəzi inşa edilir ki, bu Qış Bulvarı layihəsinin birdəfəlik basdırılmasından başqa bir şey deyildir.

Aşağıdakı şəkillərə diqqətlə baxın… Bu hadisələr indi hamının başına gələ bilər!




 







Tags: Avropa İnsan Hüquqları Məhkəməsi, Bakı Şəhər İcra Hakimiyyəti, Qış bulvarı, amansız rəftar, qeyri-insani rəftar
Subscribe

  • Post a new comment

    Error

    Anonymous comments are disabled in this journal

    default userpic

    Your reply will be screened

    Your IP address will be recorded 

  • 0 comments